Bo Nadal!

Aproveitade as vacacións para ler moito e descubrir algunha historia estupenda. Á volta, compartímolas!

Novo enlace para traballar as mates!

Un dos compañeiros novos que chegaron este curso, Carlos S, recoméndanos este enlace para traballar as matemáticas. Botádelle unha ollada e xa nos contaredes. Déixovolo tamén no apartado de xogos.

Unha chea de cousas por facer!

Estamos xa metidos en plena actividade na clase de Lingua Galega. Por un lado estamos a rematar os anuncios publicitarios da biblioteca Xanela, poñeremos os traballos no blogue en canto estean listos. Por outro, estamos en plena creación de contos de medo para o noso Samaín. E iso sen olvidar todo o traballo ordinario: fichas, actividades, lecturas...
Ademais, como xa sabedes, os martes, aproveitando que temos outra profe de apoio na clase, facemos dous grupos e mentres un deles vai á biblioteca para facer o préstamo dos libros o outro queda na clase e facemos unha actividade de expresión oral en galego. Está funcionando moi ben e penso que vos gusta moito ter a ocasión de falar nun grupo pequeno (9-10 rapaces e rapazas) sobre diferentes temas. Hoxe o debate deuse a partir dunha viñeta que vos presentei. As vosas opinións foron moi interesantes e como seguro que estivestes a pensar nisto logo de acabar, aquí vos deixo a imaxe. Por favor, facede comentarios expresando a vosa opinión ao respecto.

Empezamos de novo!

Xa estamos no cole outra vez! Atrás deixamos o verán, as horas de praia... Pero vimos con forzas para este novo curso que nos espera. Xa sodes alumnas e alumnos de 6º e iso impresiona, a verdade, hai que ver que maiores!
Temos que dar a benvida a un novo compañeiro no grupo, Carlos, que esperamos se sinta xenial no seu novo cole.
Polo de agora máis nada, xa iremos vendo! Estade atentos!

Investigamos a Ana Mª Matute, premio Cervantes 2010

O 23 de abril de cada ano, dende 1976, e coincidindo coa celebración do Día do Libro, fállase o Premio Cervantes. Este ano dito premio recoñece o labor literario de Ana Mª Matute, unha das nosas autoras máis prolíficas que ademais está considerada como unha mellores novelistas españolas da posguerra. Ana Mª Matute convértese na terceira muller en obter este galardón. Ten moitas novelas e contos que teñen aos nenos e nenas como protagonistas. Para máis información sobre ela, picade nos enlaces e disfrutade destes vídeos. Neste enlace podedes tamén ler con calma o texto íntegro do seu discurso na entrega do premio.

enlace á reportaxe na TVE
Na clase faremos un pequeno traballo de investigación sobre ela que teredes presentar en formato papel tal como explicaremos na clase.

Vai de falar...

Xa estamos metidos de cheo noutra actividade. Estes días andamos a preparar unha exposición oral. O tema seremos nós mesmos! Para axudarnos na nosa presentación utilizaremos as TIC´s (Tecnoloxías da información e Comunicación). Todos os rapaces e rapazas da clase andan na procura de imaxes que falen deles mesmos: da súa vida, dos seus desexos, das súas inquedanzas... Cando as teñades listas tedes que montar unha pequena presentación de diapositivas para a que podedes utilizar o powerpoint ou o openoffice.impress tal como vimos na aula.

Recordade que a exposición ten que ser en galego e durar entre 4-6 minutos. Practicade na casa!

Tamén é unha boa ocasión para que os pais e nais, avós, tíos, etc, pasedes un tempiño compartindo recordos, risas e traballo. Axudade aos vosos fillos a seleccionar as imaxes e a preparar o que poden contar, seguro que disfrutaredes!

E ollo!! O luns empezamos coas presentacións!

Imos de Entroido!

Xa chega o tempo das máscaras, dos choqueiros, dos peliqueiros, dos cigarróns... Na Coruña, en Laza, en Verín... En toda Galiza se respira xa o ambiente de festa! Pero o entroido é moito máis ca iso, ten a súa historia, e iso é o que imos aprender e investigar estes días na aula, aprender do pasado para mellorar o noso presente, o noso futuro.

Para facelo imos utilizar unha "caza do tesouro" elaborada polo CEIP Mestres Goldar de Vigo, "O entroido tradicional galego". Tomade boa conta das instruccións!

Cando rematedes podedes comprobar o que aprendestes no seguinte cuestionario en liña.

Nota para as familias: o traballo de investigación estase a facer na clase. Á volta das vacacións de Entroido teñen que traer o traballo rematado tal como se lles explicou.

ÁNIMO!

A auga dos bosquimanos

Como podedes ver nesta noticia de hai uns días, o problema da auga non é cousa do pasado, mirade o que lles pasa aos bosquimanos. Lédea con atención, tamén a traballaremos na aula.

O proxecto da biblio

Estes días estamos empezando a traballar no proxecto da biblioteca do noso cole. Xa sabedes que o tema é a auga. Na nosa clase traballaremos "A auga na literatura". Polo de agora estamos na procura de substantivos, adxectivos e verbos que teñan relación coa palabra "auga". Xa temos unha morea deles. Proximamente veremos de facer unha wiki con todo o traballo. Polo de agora tedes que ir buscando máis palabras e tamén todos aqueles poemas e contos nos que se fale da auga.
A semana que vén conmemórase tamén o Día Internacional da Paz e Non-Violencia e relacionándoo co tema do proxecto traballaremos o conflicto da auga no mundo. Non todos os países nin zonas xeográficas teñen a mesma sorte en canto ao reparto deste ben tan preciado. Neste enlace podedes ver as dificultades que teñen algúns pobos para acceder á auga potable
Polo de agora... Qué vos parecen as actividades que estamos a facer? Tedes algunha idea? Deixade os vosos comentarios.
Para empezar podemos ver este vídeo: